SISD – Akadiruhun, 15 Maiu 2026 – IX Governu Konstitusional liu husi Secretaria Estado ba Comunicação Social kontinua promove programa dijitalizasaun iha suku sira iha Timor-Leste hodi fasilita komunidade asesu ba informasaun ho transparente no lalais.
Liafuan hirak ne’e hato’o husi Ramario da Costa, Sefi Departementu ONG Munisipiu Dili ne’ebe reprezenta Direitor ONG Munisipiu Dili no Presidente Autoridade Munisipiu Dili, Sesta (08/05) iha seremonia lansamentu plataforma suku dijital – Akadiruhun foin lalais ne’e.
“Ita tenke agradese no apresia ba IX Governu Konstitusional ne’ebé fasilita Konsellu Suku sira husi nível nasionál to’o iha suku atu implementa programa dijitalizasaun. Ita espera katak programa ida-ne’e sei kontinua no hetan apoiu husi Secretaria de Estado da Comunicação Social, nune’e munisípiu 13 no suku sira iha Timor-Leste bele partisipa hotu. Liu husi programa ida-ne’e, komunidade sira bele asesu ba informasaun ho transparente liu husi média no internet. Dalaruma komunidade protesta tanba informasaun barak seidauk to’o ba sira. Tanba ne’e, Governu estabelese política dijitalizasaun atu fasilita ema hotu asesu ba informasaun kona-ba programa nasionál no internasionál. Agora, la presiza mai Dili hanesan uluk; tu’ur de’it iha fatin ida-idak, ema bele hetan informasaun ho lalais liu husi sistema dijitalizasaun,” dehan Amario.
Tanba ne’e, Amario hatutan nia agradese ba IX Governu Konstitusional, liu husi Secretaria de Estado da Comunicação Social no Telkomcel, ne’ebé fó ona formasaun durante semana ida ba pesoál suku no aldeia iha Akadiruhun. Formasaun ida-ne’e nia objetivu mak atu fasilita estrutura suku no komunidade sira kona-ba oinsá atu públika no dissemina informasaun suku nian liu husi Plataforma Suku Dijital.
Hau hanoin katak maluk sira ne’ebé hetan ona treinamentu tenke utiliza ho di’ak formasaun durante semana ida ne’e atu hadi’a ita boot sira nia servisu. Se iha dúvida ruma ka seidauk komprende klaru, hau husu atu sira bele kontinua hanorin ita atu hatene kle’an liu tan, nune’e ita nia servisu bele lao ho di’ak. Hau mós hakarak tekankan dala ida ba maluk sira ne’ebé partisipa iha treinamentu ida ne’e, tanba iha Munisípiu Dili mos funsionáriu balu seidauk hetan formasaun hanesan ida-ne’e. Maibé ita agradese katak iha nível suku ona hetan treinamentu ida ne’e. Husi kraik maka sae mai, ne’e di’ak liu tan duké husi leten maka tuun mai; dala ruma ita la haree klaru ba situasaun ne’ebé iha kraik,” tenik Amario.
Objektivu husi establesementu plataforma suku dijital ne’e maka atu kria espasu ba estrutura suku sira, hodi divulga informasaun suku no atividades suku nian no promove potensialidade suku liu husi kobertura atividades suku nian.
Hakerek : Equipa Sentru Informasaun Suku Dijital – Akadiruhun
Editor : Rogerio Soares Andresa Guterres Coutinho
