BIDAU SENGOL, 14 Maiu 2026 – Falta zebra cross iha estrada publiku iha area Bidau Sengol sai problema boot ida ne’ebé ameasa seguransa ema la’o ain sira. Loron-loron, ema barak hanesan estudante, inan-aman, labarik no katuas-ferik sira utiliza estrada atu ba eskola, merkadu, igreja, fatin servisu no atividade lor-loron seluk. Maibé, tanba laiha zebra cross no sinalizasaun ne’ebé apropriadu, sira hasoru risku aas bainhira atravessa estrada.
Zebra cross importante tebes tanba sai sinal ba motorista sira katak fatin ne’e mak area espesiál ba ema la’o ain atu atravessa estrada ho seguru. Ho iha zebra cross, motorista sira bele hatene katak sira tenke hamenus velocidade no fó prioridade ba ema la’o ain sira.
Maibé iha parte Bidau Sengol, hahu husi rotunda Ponte BJ Habibie to’o iha kurzamentu Kuluhun, seidauk iha marka zebra cross ne’ebé klaru no apropriadu. Situasaun ida ne’e halo ema sira difisil atu atravessa estrada, liu-liu iha tempu movimentu boot hanesan dader no lokraik.
Problema ida ne’e bele lori ba akidente trafiku ne’ebé perigozu no ameasa vida ema nian. Motorista balun lao ho velocidade aas no dala barak la fó prioridade ba ema la’o ain sira. Tanba laiha zebra cross, ema sira tenke atravessa estrada ho maneira arbiru, ida ne’ebé fasil tebes atu hamosu desastre ka akidente trafiku.
Estudante sira mak grupu ne’ebé vulneravel liu tan. Loron-loron, sira tenke atravessa estrada atu ba no fila husi eskola. Se laiha zebra cross no sinal trafiku ne’ebé di’ak, sira bele hasoru akidente ne’ebé bele fó konsekuensia grave ba moris no saude. Aleinde estudante sira, katuas-ferik no labarik ki’ik mos difisil liu atu atravessa estrada tanba sira la bele halai lalais no ladun komprende situasaun trafiku ho di’ak.
Aleinde ne’e, falta zebra cross mos hatudu katak infraestrutura publika seidauk fó atensaun suficiente ba seguransa ema la’o ain sira. Estrada publiku la’os deit ba kareta no motorizada, maibé mos ba ema hotu ne’ebé utiliza dalan. Tanba ne’e, governu no autoridade relevante tenke tau prioridade ba seguransa publika, liu-liu seguransa ema la’o ain sira.
Atu resolve problema ida ne’e, governu liu husi ministériu relevante no autoridade trafiku tenke halo marka zebra cross ho lalais iha fatin importante sira iha Bidau Sengol, liu-liu besik eskola, merkadu, igreja no area ne’ebé ema barak atravessa. Aleinde halo zebra cross, importante mos atu instala sinal trafiku, luz sinalizasaun no halo kampanha konsiensializasaun ba motorista sira atu respeita ema la’o ain no kumpri regra trafiku.
Komunidade mos iha responsabilidade atu tau atensaun ba seguransa estrada no fó hanoin ba autoridade sira kona-ba nesesidade infraestrutura ne’ebé seguru. Ema hotu tenke iha konsiensia atu respeita regra trafiku no kuida malu bainhira utiliza estrada publiku. Bainhira governu no komunidade servisu hamutuk, seguransa iha estrada bele aumenta no risku akidente bele hamenus.
Konkluzaun ;
Falta zebra cross iha estrada publiku iha parte Bidau Sengol mak problema serius ida ne’ebé ameasa vida ema la’o ain sira. Se problema ida ne’e la resolve lalais, risku akidente sei kontinua aumenta no bele lori sofrementu ba familia no komunidade. Tanba ne’e, presiza iha atensaun no asaun imediata husi governu no entidade relevante sira atu asegura katak ema hotu bele uza estrada ho seguru, konfortavel no hakmatek.
Mensajen Importante ;
- Zebra cross la’os deit marka iha estrada, maibé proteksaun ba vida ema la’o ain sira.
- Motorista sira tenke respeita ema la’o ain no hamenus velocidade iha area movimentadu.
- Mai ita hamutuk kria estrada ne’ebé seguru no organiza ba ema hotu.
