SISD – Akadiruhun, 07 Maiu 2026 –Maski prosesu alargamentu estrada públiku iha area Bidau Sengol remata ona, maibé to’o oras ne’e seidauk iha zebra cross atu fasilita ema lao ain hodi ultrapasa husi sorin ida ba sorin seluk. Situasaun ne’e halo autoridade lokal preokupa tanba bele aumenta risku asidente trafiku iha área refere.
Xefe Suku Bidau Akadiruhun, Juvinal da Conceição, hateten bainhira laiha zebra cross iha estrada publiku parte Bidau sengol, ida ne’e sai preocupasaun boot ba Autoridade Suku no komunidade sira, tanba ida ne’e bele hamosu risku desastre ba ema lao ain sira wainhira laiha fatin espesífiku atu hakat ba estrada sorin no sorin seluk.
“Tuir hau nia observasaun, alargamentu estrada iha Sengol seidauk iha zebra cross. Ida ne’e sai preokupasaun boot tanba bele akontese desastre lor-loron. Ema lao ain sira la iha fatin seguro atu hakat ba sorin seluk no dalaruma kareta ka motor bele soke sira,” dehan Juvinal.
Nia mos hateten Autoridade Suku iha ona planu atu fó rekomendasaun ba Governu no instituisaun kompetente sira hodi konsidera konstrusaun zebra cross iha área refere.
Tanba tuir Autoridade Suku, ida ne’e importante liu atu garante seguransa komunidade, liuliu estudante sira ne’ebe eskola besik estrada publiku.
“Importante atu iha zebra cross para komunidade no estudante sira bele hakat ho seguru. Bainhira iha sinalizasaun zebra cross, motor no kareta sira mos bele hatene katak fatin ne’e área atu ema lao ain ultrapasa estrada,” hateten Xefe Suku.
Nune’e maka komunidade sira hein katak governu no autoridade relevante bele fó atensaun lalais ba problema ne’e atu prevene asidente trafiku no asegura seguransa ema lao ain sira iha area Bidau Sengol.
Hakerek : Equipa Formado/a Sentru Informasaun Suco Dijital (SISD) Akadiru-hun
Editor : Equipa Formador Jornal Parede Dijital (JPD) DNDM SEKOMS
