MORU SEDE SUKU AKADIRUHUN SEIDAUK KONSTRUI
SISD-AKADIRUHUN, 06 MAIU 2026 – Prosesu alargamentu Estrada publiku iha area Bidau Sengol afeita mos ba moru Sede Suku Akadiruhun iha tinan kotuk maibe to’o oras ne’e seidauk halo konstrusaun foun ba moru refere.
Xefe Suku Bidau Akadiruhun, Juvinal da Conceiçâo ba Sentru Informasaun Suku Dijital, Kuarta (06/05) semana ne’e hateten husi nia parte no konselhu do suco preokupa tebes ho kondisaun ida ne’e tanba laiha seguransa atu asegura sede do suku iha future.
“Ida ne’e sai preokupasaun ba hau nudar Sefi Suku no hau nia Konselhu do Suku katak pasu konstrusaun ne’ebe maka akontese, afeta mos ba ita nia Sede do Suco, nudar Sefi Suku hau iha meius ona, foin dadaun ami tu’ur hamutuk ho sr. Rogerio, ita halo ona rekomendasaun ka pedido para oinsa ho situasaun ne’ebe liga ho foin dadaun akontesementu entre joven sira husi parte Tokobaru ho ita nia joventude sira tuda malu, ida ne’e mos impaktu ba ita nia Sede Suku”, dehan Sefi Suku ne’e.
Tuir lideransa suku ne’e katak pedido hirak ne’e hato’o ona ba parte Obras Publik no hein deit resposta hodi konstrui fali moru sede suku nian.
“Momentu ne’e pedido mos ami hatama ona to’o agora ita hein deit, se’e karik Obras Public hatene ona konaba problema sira ne’e, oinsa bele aselera lalais prosesu konaba ita nia moru ida ne’e, para bele asegura ita nia sede do suku”. Tenik Conceiçâo.
Nia mos haktuir bainhira la halo konstrusaun ba moru sede do suku nian, ida ne’e bele fo’o impaktu nafatin ba sede do suku iha future tanba la seguru.
“Kalau ita seidauk halo moru iha parte sede suku ida ne’e iha impaktu tanba saida, la seguru, dalaruma sempre akontese tinan-tinan tanba hau hatene katak ne’e akontese dala tolu ona, ida ne’e impaktu los tanba seguransa laiha, tanba ne’e maka ami ejiji lalais ba governu no ba kompania, tanba nia (kompania) maka responsabilidade konaba moru ida ne’e, hakarak ka lakohi lalais halo ona moru ne’e, atu bele asegura no bele fo’o seguransa ba ita tanba agora ne’e mos ita nia sede do suku, buat hotu hotu kompleitu, se’e karik ba futuru maka la hadia moru ne’e seifo’o nafatin impaktu bai ta nia servisu tanba laiha seguransa no la seguru”. Conceiçâo hatutan
Hakerek : Equipa Formando/a SISD- Suco Kuluhun
Revizaun : Equipa Formador JPD DNDM SEKOMS
