NEGOSIANTE KONTINUA OKUPA ESPASU PÚBLIKU HODI HALA’O NEGÓSIU
SISD – Akadiruhun, 07 Maiu 2026 – Negosiante hahán iha area Bidaun Segol to’o oras ne’e kontinua halao ativiaddes negosiu nian hodi okupa espasu publiku iha tempu kalan.
Agostinho de Jesus Pereira nudar negosiante ida iha area Bidau Segol hateten katak nia hili fan hahán iha espasu públiku tanba nesesidade ekonomia família nian no atu sustenta moris lor-loron.
“Ami fan hahán iha fatin públiku ne tanba nesesidade uma laran hodi sustenta moris,” dehan Agostinho.
Tuir negosiante ne’e atividade negósiu ne’ebe maka sira halao durante ne’e seidauk hetan autorizasaun formal husi entidade kompetente maibe ida ne’e husi sira nia iniciativa rasik atu buka rendimentu ba família. Maski nune’e, nia rekoñese katak atividade ne’ebe halao iha espasu publiku sempre iha risku.
“Hanesan ne’e mak konsekuénsia ba ami. Ami hatene katak fatin ne’e espasu públiku no risku mos iha,” hateten nia.
Agostinho mos hatutan espasu públiku bele uza husi ema hotu, tanba ne’e nia la iha problema se’e ema seluk mos hakarak halao atividades hanesan iha fatin refere.
Iha sorin seluk, Xefe Suku Bidau Akadiruhun, Juvinal da Conceição, hateten presença vendedores iha espasu públiku sai preokupasaun boot ba autoridade lokal, maski nia komprende katak maioria vendedores sira hasoru difikuldade ekonomia família nian.
“Hau nudar xefe suku halo aprosimasaun ho vendedores sira no sira hateten katak situasaun ekonomia família mak obriga sira atu mai fan iha ne’e,” dehan Juvinal.
Nia haktuir durante ne’e autoridade suku kontinua halo diálogu ho vendedores sira atu kuida ambiente iha área refere, nune’e negosiantes sira mos simu orientasaun la halo foer iha fatin refere..
Maski nune’e, Xefe Suku reafirma katak espasu públiku labele uza permanente ba atividade komérsiu tanba área refere destinada ba komunidade sira atu halimar, halo ezersísiu no uza livremente. Nia destaca liuliu inan isin-rua, labarik no ema ho defisiénsia sira ne’ebé presiza espasu ne’e atu lao no halo atividade sosial.
“Espasu públiku ida ne’e loos duni atu komunidade lao halimar no halo ezersísiu, la’ós atu okupa tomak ba negósiu,” hateten nia.
Juvinal mos informa katak autoridade lokal halo ona koordinasaun ho Administrasaun Postu, Prezidente Autoridade Munisípiu Dili no Ministériu relevante sira, inklui SEATOU, atu buka solusaun ba problema refere.
Tuir nia, governu prepara hela regulamentu ida atu organiza vendedores sira ne’ebé hala’o negósiu iha espasu públiku. Regulamentu ne’e sei define kritériu no regras ne’ebé vendedores tenki tuir bainhira hakarak fan iha área públika.
“Informasaun ne’ebé hau simu husi Prezidente PAM katak iha tempu badak sei iha orientasaun no regras klaru ba vendedores sira atu sira bele fan tuir normas ne’ebé governu determina,” Xefe Suku ne’e hateten.
Atividades negosiu iha area Bidau Sengol hodi okupa espasu publiku ne’e halao iha tempu kalan hahu husi tuku walu liu menutu tolunulo kalan to’o tuku sanulo resin rua kalan boot.
Hakerek : Equipa Formado/a Sentru Informasaun Suco Dijital (SISD) Akadiru-hun
Editor : Equipa Formador Jornal Parede Dijital (JPD) DNDM SEKOMS
